طره لاند ..سجن ( نظيف وكله سرورولايدخله شريف ومبارك عليه اللي سجنهم يشاهدون الآن فيلم أين عادلي ؟!!

مش ممكن اللي بيحصل ده ؟؟..مين يصدق ان الدولة والنظام كله هيشرف داخل سجن طره ؟؟..والله لو كان الواحد بيحلم كان شك في قواه العقلية...

الموضوع مش ممكن يكون بس اللي حصل في 25 يناير ..لا لكن النظام كله السوس نخر في عضمه ومن اقل هزه انهار فجأة وسط توقعات كانت مستحيلة !

لا اله الا الله ..

المعز المذل ...

كما فعل في قارون وفرعون وهامان ..

يفعله الآن بقدرته في فرعون هذا العصر ووزير داخليته هامان وفساد قارون بأمواله المسروقة من دماء الشعب..

انها قصة الظلم والطواغيت ..

هل نعتبر تلك اللحظة انطلاقة لنتخلص من مرض الاستبداد والديكتاتورية التي رزخت فيها شعوبنا حتي ذاقت الذل وشربت الهوان في كئوس المرارة ..

هل نحترم شبابنا الواعد ونعطيه استقلاليته ولا نفرض عليه وصايا الاباء والاجداد من الاستسلام والتسليم لكل من هب ودب خوفا ورعبا وهلعا ...من حياة الحرية والاستقلال ...

ممكن نعطي لكل واحد حرية أن يعلن رأيه بلا خوف او رعب او اقصاء وتكفير وتخوين ..ممكن..

احنا االي صنعنا الطغمة دي بسكوتنا السنين الطويلة وصبرنا المرضي علي الذل والهوان والرضا بلقمة العيش المغموسة بالذل والاستكانة ...

هو حسني مبارك واللي معاه لما حضروا وحكموا مصر لقيوا الكل بيوسع ليهم السكة ويمنحهم صكوك التسليم علي بياض ولقيوا صلاحيات مطلقة يعملوا اللي عايزين يعملوه بدون ملامة ولا عتاب !!!

واللي يلاقي دلع وميدلعش نفسه يبقي ظلم نفسه !!

ممكن نعرف المشكلة فين وايه سببها وايه اللي وصل الناس دي لكم الظلم والفساد ده ؟؟

علشان مايتكررش اللي حصل ؟؟

ممكن مانخافش بعد كده

ممكن نحارب اي واحد عاوزنا نسمع ونطيع له طاعة عمياء حتي لو كان ملاك طاهر ؟؟؟

واللا نفتح طره لاند في كل محافظة والعرض مستمر ..

اييييييييييييييييييه ..وبعدين ؟؟

نقوووول كمان 
___________
ـ سمعت اللي حصل..؟؟
ـ ايه اللي حصل ؟؟
ـ شعبان عبدالرحيم ..
ـ ماله ؟؟
بيقول انا اول واحد كنت عارف ميعاد ثورة 25 يناير 
ـ ازاي ؟؟
قال ايه كان بيغني اغنيته المعروفة ( هبطل سجاير من أول يناير واكون انسان جديد ) مرضيش يقول في الاغنية هبطل سجاير من اول 25 يناير علشان ميكشفش السر والعادلي يعرف يقوم يجهض الثورة...عجبي !
( الحكايات دي من تأليفي محدش يفتكر انها حصلت بجد !!)
بمناسبة طرة لاند ..واحد راح طرة وقاللهم انا من الفلول قالوله فلول ايه قال فلول الحزب الوطني والنبي خدوني نفسي اعيش اليومين الفاضلين ليا علي وش الدنيا مع بتوع الفلول وانا كنت من بتوع الفول ( المدمس ) وعاوز ابقي من الفلووول ..ياريتني كنت فاسد كنت رحت معاهم !!

كتبه : محمد امام نويرة

بشري عظيمة للمصريين (المجلس الموازي ) اتولد يارجالة واللي نفسة في حاجة " موازية " بمرقة الدجاج يطلب ؟؟!!

هو أيه العبط ده ؟؟!! 

معقووووول ؟؟!

معقوول العبط يوصل للدرجة دي؟؟!..

قال أيه ..( الشر بره وبعيد ) اللي سقطوا في الانتخابات زعلانين من الحكومة اللي اشبه بالزوج اللي اتجوزهم زواج متعة وطردهم وكلهم لحم ورماهم عضم ! وبالصوت الحياني عاملين زي لامؤاخذة النسوان اللي ..وهات ياردح وشتيمة قدام محكمة زنانيري علي الراجل اللي..طلقهم ورماهم بعد ماظبٌطوا حياتهم علي الراتب بتاع مجلس الشعب وخلفوا ولاد ..ومنين ياحسرة هيصرفوا عليهم دلوقت ؟؟ يمكن الاخوان يدوهم شوية مصاريف لغاية لما المحكمة تحكملهم بالنفقة المزعومة ! وبقرار من المرشد يصرفولهم راتب لغاية لما تفرج !...
المشكلة ان مواجهة تزوير الانتخابات اللي تمت بصورة لم تحدث  سابقا الا في انتخابات 1979 اللي سقطوا فيها كل رموز المعارضة المستقلة ايام اليادات يعني مواجهة التزوير اللي حصل بلعب عيال اختراع اخواني اسمه مجلس موازي دي فكرة اللي بيهزر مع الحكومة بهزار مايزعلوش لان الموضوع اكبر من تزوير انتخابات النظام السياسي المصلاي ترهل وسمن وبقي ملظلظ ومش قادر يمشي ويتماشي مع المتغيرات وان النظام كله هو المريض اصلا ومسالة تزوير الانتخابات فرع من القضية الاساسية اللي هي النظام السياسي برمته ( وبرمته اففففف  تنفع برضه !).

ياخويا باتفرج علي برامج التوك شو بتاعة قنوات شوادر السمك وشوادر البطيخ اللي بيسموها قنوات فضائية وهيه سبوبة عاوزة مصيبة تشتغل عليها ..عاملين زي اللي بيشتغل في تغسيل الميتين ودفنهم " حانوتية " بالأجرة قاعدين مستنيين رزقهم لما الميت تطلع روحه علشان يسترزقوا..اهو كده بالضبط ..! ماصدقت القنوات دي مسكت " أفيونة " المجلس الموازي رضي الله عنه وهات ياحوارات وتعالي نسمع واحد بعيد عنك ربنا مايكتبها لحد واحد من الساقطين اللي انا مفروس منه والله العظيم من المجلس اللي فات اسمه دكتور جمال زهران (حمقي وبيتعصب ومتنرفز علي طول وحاطط شمع علي وشه علشان كده مش قادر ياعيني ولاحول ولاقوة الا بالله يقدر مرة واحدة ..مرة واحدة يبتسم أو يوسع "حنكه" ..ازاي؟؟!.. انا مش عارف بياكل ازاي؟؟.. المهم هو اللي باقصده ..الساقط النايب  ..هو بشحمه ولحمه ونفس الشكل ( بذكاوتة او غباوته مش تفرق ) المهم ماصدق سقط من هنا ياولداه ( والله انا مبسوط فيه كده بالعربي المفتشر ! ) يادوبك سقط من هنا وكل كميه الضيق والتبرم والزعل والألم والحزن ..ياعيني وارث آبار ارتوازية مالحة مملحة من الضيق والحقد علي البشرية جمعاء بلا استثناء وقال ايه ياعيني بيتكلم وهو متنشي كده ...واقف قاعد متنشي وبيتحرك هندسيا يعني اما علي شكل حرف H او كرسي مقلوب أو "كرسي في الكلوب".. مش مهم ...تخيل وهو متنشي  كده وواقف يقعد.. لألأ ..مش بيقعد... بينكسر... أي والله بينكسر... زي الخشب او خشب بمفصلات... المهم جتله علي الطبطاب ...أقصد سقوطه... الساقط النايب ..سقط ...جتله علي الطبطاب.. لانه ..فرصه ...طلٌع كل المخزون اللي عنده!.. زي مخازن بيع المصنوعات كده فيها بضاعة متخزنة من الستينات  ..يعني طلع كل مخزونه من القرف والضيق والتبرم والحقد.. طلع مره واحدة في الفضائيات ..وهات ياشتيمة.. فرصه ..لأ وأيه قاعدة قدامة مذيعة اون تي في ..هيه بصراحة اون تفووو ..في ..مذيعة كده أبلكاش خشب متركب عليه ملابس أنتيكة.. وزي مايكون والله أعلم هيه فتاة خشب..لابسة حريمي.. والمخرج مركب فيها مايك وهو اللي بيتكلم..!.. المهم صاحبنا الساقط النايب اللي كاره نفسه وكاره الدنيا نموذج آخر زمن للمعارضة اللي أشبه بالمعارضة بتاعة المحاكم ..هي مرحلة ..بعدها استئناف... بصراحة ياريت دول اللي كل  اللي مزعلهم سقوطهم قدام دوايرهم وضياع كرسي الكلوب بتاعه وهيه القضية قضية كرسي برلمان مع نظام كله عليل ومريض مايعملوا زي البرادعي اللي مش شاغل نفسه بقضايا فرعية تافهة ورافض النظام كله والانتخابات كلها لان الموضوع مش موضوع برلمان يرضوا بقواعد اللعب فيه اللي حاططها المخطط الدولي  احمد عز ودول مستنيين فتات الموائد يرمي ليهم !! ترحمت علي المعارضه زمان في السبعينات الاستاذ محمود القاضي والمستشار ممتاز نصار وغيره كل شيء دلوقتي تقليد أو زي مناديل الاكلينكس استعمال معارضة واحدة أقصد مرة واحدة ...مش زي زمان مناديل محلاوي تستمر طولة العمر تؤدي غرضها وتستحمل كل انواع الأفرازات وتتغسل وتتكوي وترجع تاني أحسن من الأول ...الايام دي مناديل كلينكس استعمال مرة واحدة ...وممكن من رداءتها تيجي تحطها علي مناخيرك تتخرم وتنفجر ألف حتة ..وتطير في وشك زي العملية الانتحارية ..المهم عمنا الدكتور جمال زهران والله انا كنت فاكر أنه صاحب مصنع المونيا مالوش في المعارضة ..بص كده للاشيء.. وهو بيهدينا حسب تفكيره المحدود اكبر هدية قال أيه المجلس الموازي.. أصل كل واحد سقط ..عقله " وزه " ...وفكر في الموضوع ده وده مشروع عامل زي تمثيل في مسرح الجريمة لزوم التحقيق ..أي والله !...واهي فرصة للتسلية ليهم علي رأي السيد الرئيس خليهم يتسلوا ..!
الشخص التاني اللي بيثير عندي حالة من القرف والاستياء لانه عباره عن شيء هلامي لاطعم ليه ولا لون ولا رائحة ..ماسخ كده زي الشوربة بتاعة العيانين في المستشفيات الحكومية ! ..
اسمه عصام سلطان وده حالة تعبير عن الوضع المأساوي اللي وصلتله المعارضة في مصر ...هو كان اخوانجي سابق واتفصل في موضوع حزب الوسط ( بتسكين السين ) صح كده لأنه كان فاكرينه هيهز الوسط السياسي المنحل ..وبعدين اذا كان فاكر نفسه انه سياسي ومفكر مجابتوش ولاده ...طبعا مش بالضروره أنه كان نجم في الاخوان وداخل عنابر وسراديب الأخوان وكان لما ييجي يتكلم داخل تجمعات الاخوان يهتفوله ويكبروا عليه ويبخروه من الحسد.. لأنه حسب تصوراتهم مفكر بس داخل الاخوان ومش بالضرورة أنه يكون بنفس الطريقة والحجم الاعتباري الاخوانجي برضه في الحياة السياسية العامة وفي المجتمع السياسي المصري لانه لو بدأ من الصفر في المجتمع السياسي المصري عمر ماحد كان سمع بيه ولا عنده القدرات اللي توصله لاي شيء بالكتير كان لسه بيلعب كورة شراب في جرن ابوصميدة ولاعمره كان ممكن يتنقل للعب في مركز شباب عزبة في أقصي صعيد مصر ..لانه في الجو الطبيعي والهواء النقي وفي لعبة السياسة علي اصولها ماعندوش قدرات تؤهله لأن يصل لأي شيء.. يعني كل الموضوع أنه كان نجم داخل فضاء الاخوان الفاضي أصلا ...موضوع مش يهمنا اصلا ..ولكن لأن المعارضة المصرية في أزمة اصبحت بتستورد أبجديات الآخوان والعاب واكروبات الاخوان زي لعبة المجلس الموازي اللي اصلا كانت لعبة صبيانية للاخوان اخترعوها في العاب انتخابات اتحاد الطلبة وعلشان يغيظوا الأمن وبيسقطوا في انتخابات اتحاد الطلبة فاخترعوا لعبة المجلس الموازي يقوم يصدروها للاحزاب المصرية اللي كانت زمان طلعت الأكابر والعبقريات زي سعد زغلول ومحمد فريد ومصطفي كامل وفي السبعينات حزب الوفد الجديد وفؤاد سراج الدين باشا ومحمود القاضي والمستشار ممتاز نصار وغيرهم الكثير... يصبح النهاردة الاحزاب لا فيها ابداع سياسي ولا فكر.. حتي ولا روح ...يقوموا يتبنوا فكرة بالية اخوانية اللي هيه المجلس الموازي حاجة كده زي لعب العيال في ...!..ويفرضوا علي قواعد اللعب السياسي افكار الأخوان التافهة في علم السياسة !...وهو ده منتهي الأبداع عند لاعبي السياسة الجدد في الاحزاب المصرية وفي المعارضة.. عموما هتقول ايه اذا كان اللي بيخطط للمعارضة الفقيرة في الفكر وفي كل شيء أمثال جمال زهران وعصام سلطان بتاع الجبهة المصرية للتغيير اللي خربها وقعد علي تلها بأفكاره المهلبية وتشوفه ياخي في الفضائيات جاي الحلقة وبرامج التوك شو متنشي وكأنه نقعوه في طشت خل ثم غطس نشا وبعدين كوي البدلة بمكوي حديد بتاعة الرجل وشعره أيه حاطط عليه كيلو سمنة نباتي بتاعة الكراتين أو زيت تموين ويتكلم بلغة الأخوان كأنه قاعد في حلقة دروشة اخوانية وبيقرا ورد الرابطة ماهو ماعندوش حاجة اصلا لاموهبة ولا فكر غير أنه كان بيفتتح قعدات الأخوان بتلاوة ورد الرابطة وبعدين أي كلام ..ثم الدعاء ..ثم سبحانك اللهم وبحمدك ..ونتيجة أنه ماشي اليومين دول أن الموضة اللي ماشية اي واحد اخوانجي سابق أو لاحق.. حلوة دي ..لان المعارضة المصرية الفقيرة في كل حاجة.. بتلتمس الآن البركة من الاخوان ..وببوسوا علي ايد اي واحد منهم.. لزوم الفرفشة ..وضل الأخوان ولا ضل حيط !..ميعرفوش مثلا أن الاخوان مابيقبلوش ولا بيحبوا المعارضة.. وانهم في السياسة بيمثلوا ويلعبوا اسكتشات تموت من الضحك ..يعني مثلا دخلوا الجبهة المصرية للتغيير ورا البرادعي وبعدين الجبهة قررت مقاطعة الانتخابات ماسمعوش كلامهم ودخلوا الانتخابات وبعدين قاطعوها في الاعادة وفي 2005  رفضوا التنسيق في الانتخابات لانهم حاسين انهم مش محتاجين حد والفرصة بتقول انهم جايين بضوء اخضر من الحكومة وضربوا المعارضة وتحالفوا في السر مع عشيقهم المفترض اللي هو الحكومة وضربوا المعارضة والمرة دي لان العشيق زعلان معاهم وشاف واحدة تانية أو بده يتجوز رسمي وعلني أو ناوي ففي ضعفهم المرة دي ..لجأوا للمعارضة بقرف أي والله همه اصلا مش بيحبوا المعارضة لانهم هايمين في العشق الحرام مع الواد الحكومي الرسمي مجنونين بيه وبيلعبوا معاه اللعبة المتكررة دي والناس تشوفهم زعلانين مع بعض وبيشتموا بعض وبيقطعوا هدوم بعض وميعرفوش أن بالليل في سهرة حمرا بحنوا لبعض لممارسة الرذيلة السياسية !

المهم نخش علي لعبة المجلس الموازي اللي ظهر فجأة ..واحد بيسألني بيقولي يعني ايه مجلس موازي؟؟.. قلتله ..يعني مجلس كله مزز ..قاللي ياه ...يعني مجلس فرفشة وحظ.. قلتله آه ...وفيه غير المزز .. مزة وشرب.. واللي رايح ياكل موز.. وهو ماشي ..!

وبعدين هتتطور الفكرة وتشاع وييجي كل واحد مجوز وتعبان في عيشته مع القديمة يعمل زواج موازي وتطلع صيغة زواج جديدة اسمها زواج موازي وتلاقي اعلانات الزواج في الفضائيات تحت في الشاشة مطلوب زوجة موازية ! وهتلاقي بعد كده واحد يسألك أنت موازي ولا مطلق ! المهم عقل الواحد هيوزه علي الموازي !..بس أوعي حد يسرق مني الفكرة دي وبالذات القنوات الدينية وهأطالب بحقي في براءة الأختراع ..!!

أيه رأيك كلامي صح ولا موازي !

كتبه : محمد امام نويرة

قناة الرخمة وتدين الشيخ محمد حسان واحمد شو ( بير السلم ) ارخم عباد الله !

ايه الهيصة دي يارجالة !!

هيقفلوا قناة الرخمة ( الرحمة سابقا ) مايقفلوها ياعم ! وايه يعني ..يعني هو الاسلام ذلك الدين العظيم مرتبط في وجوده بقناة الرخمة ..

ياعم دي سبوبة يابا ..شوفوا  النعمة اللي عايش فيها محمدحسان بسبوبة التدين المغشوش اللي بينشره تدين في الزي والشكل بلا أي مضمون اخلاقي او تغيير سلوكي او حضاري لان التدين اللي بينشره وبيشتغل عليه الترويكا الدينية زعماء التدين الشكلي الخاص باليونيفورم واللحية وطول السواك (الترويكا ) المتشددين محمد حسان ومحمد حسين يعقوب  وابوا انسحاق الحويني !

كل حاجة في بلدنا مستواها نزل حتي دعاة الاسلام اللي بالحنجرة دلوقت وتقنيات الصوت وليهم مخرجين لزوم التأثر بحرقة فين ايام الناس المحترمة اللي عاشت للدعوة الاسلامية من غير سبوبة او بيزنس وعاشوا وماتوا فقرا والواحد منهم بتوع اليومين دول زي حسان ويعقوب والحويني مايجيش في مستوي بواب عند المشايخ الافاضل مثل شيخنا محمد الغزالي او شيخنا عبدالحليم محمود ولا غيرهم !

دول بتوع اليومين دول بيقدموا رخص دينية للناس علشان يدعموا مواقفهم تدين سهل ولا تسمع في قناة الناس رنة تقودك الي الجنة !

مايقفلوها ياعم والله يريحونا منهم كرهونا في عيشتنا وخللوا كل شيء حرام مش فاضل اللا مخلل الطرشي والباذنجان والفلفل !

واحد ثقة قاللي وهو اخ مسلم فاضل ! سمع الشيخ  محمد حسان بعد اشاعة اغلاق القناة كاد ان يبكي وبيهاجم الناس اللي بتحسده علي المكاسب وبيقول في كلامه لما موظف في القناة يقول عاوز مرتبي اديله حديث واقول خد شوية احاديث !..ولا بنتي عاوزة تاكل اديها شوية فتاوي لابن تيمية تاكلهم !

تمام والله انا معاك ياشيخ محمد حسان في الكلام ده بس الكلام ده انت بتطبقه علي نفسك وبتقول ايه يعني لمكا اكسب فلوس واعيش نفسي طيب انت بتزنق علي الناس ليه وبتكرههم في الحياة الدنيا والبعد عن المتع الحلال والهروب الي المقابرا والمكث فيها انتظارا للموت افضل من حياة السرف يعني انت بتنشرفقه كره الحياة والتمتع بما احله الله وبتحلل لنفسك وتنشيء قواعد مص قلوس الناس ببيع العواطف الدينية اللي الناس محتاجاها في زمن المشاكل والازمات النفسية ولو كان الناس مش واقعين في ازمات نفسية متردية وفي حياتهم مشاكل قد جبل المقطم مكانش هيكون ليك سبوبة ابدا لانك بتتاجر بامراض الناس النفسية وغاوي نجومية وشهرة زيك زي تامر حسني اللي بيحب الشهرة والنجومية انت برضه بتدور علي الشهرة والنجومية واكيد انت سعيد لما المأزومين والمرضي من معجبوك لما يشوفوا عربيتك الفارهة بيرموا انفسهم تحتها وبيضربوا بعض من اجل التسابق للمس بركاتك !

بركاتك ياشيخ محمد حسان هو بركاتك وصلت كام مليون دلوقت ياللي بتدعوا الي الزهد والتخلي عن متع الحياة الفانية واكل اللحمة ياسلام علي خدودك الحمرا من كتر اكل اللحمة والراحة النفسية من كثرة الشهرة والاعجاب من القتلي والموتي من مريدوك اصحاب الامراض والمشاكل !

عموما الله يرحمنا من قناة الرحمة ..اقصد الرخمة والله الذي لا اله الا هو لوقفلوا عيادتك اقصد قناتك ماهيأثر في الاسلام بشيء ...صح انت بس اللي هتخسر ايرادات فوق المتكوم زي جبل المقطم  !

ـــــــــــــــــــــــــــــــــــــــــــــــــــــــــــــــــــــــــ

انا مش عارف الرخم ده ارخم عباد الله اسمه احمد شو....بير السلم !

والحمد لله ان وزارة الاعلام فهمت اخيرا دوره القذر في اذكاء روح الخذلان بين جماهير مصر وبيدين بلده قدام اعدائها اللي بيكرهوها ان شالله انت يا شوبير ! اخيرا ضبطوه متلبسا بالاعتراف بان اتحاد الكره المصري هو اللي نظم الهجوم علي اتوبيس الجزائر في مصر وان اتحاد الكرة الجزائري استغل تصرحات ال شوبير في ملف التحكيم وطلب العقوبات اللي وقعت علينا زي ماوقع علينا احمد شوبير هو والتاني الرخم اللي اسمه سمير زاهر مصيبة الكرة المصرية شخصيات مكروهة مصريا وشعبيا وعلي كل مستويات الدولة !

لسة الحكومة مكتشفة شخصية احمد شو .. قبل كده خد حكم بمنعه من برنامجه وياريت حد من المحامين المحترمين يرفع عليه قضيه ويطلعه بره مصر بحكم محكمة يروح اي بلد في الشام علشان هناك يقولوله شو ....هوانت شو....بير  

والله مانا عارف الواحد هينهض في عمره اللي باقي ينهض يكتب عن ملوك الرخامة اللي خلوا انتاج واسعار الرخام من ارخص مايكون واوعه حد يتزحلق !!!

كتبه برخامه : محمد امام نويرة

وزارة التعليم والمعلمين الفاشلين وامتحان التجريبي من الجرب

مفيش فايدة 

وزير التعليم الجديد ياجماعة هيغرق في "بركة" وزارة التعليم ؟

والله ظلمنا الوزير اللي فات ...

انا قلت والله الموضوع مش اقالة وزير التعليم المطلوب اقالة الوزارة نفسها !

ليه ماتبيعش الوزارة المدارس للقطاع الخاص او اولياء الامور وهمه اللي يشرفوا علي مدارسهم اللي ملكهم ويظبطوا المسائل ويعينوا ويرفتوا اللي شايفينه يصل للتدريس والمدرسين مايجوش بعد كده ويعلقوا فشلهم ومصايبهم علي الوزارة ويروحوا قدام رئاسة الوزرا علي الرصيف وياخدوا عيالهم ونسوانهم وجيرانهم ويعترضوا علي اي حاجة تعملها الوزارة او عاوزين الكادر هو فيه حد( كادر)عليهم !.. وبعد كده بعد ما الحكومة تبيع المدارس محدش هييجي جنبها ويعمللها اي مشكلة ويادوبك بس تشرف علي المناهج وتبقي ادارة ووزارة محترمه بعيد عن مستنقع مشاكل المعلمين والعملية التعليمية اللي مش هيخلص وربنا طول ما الحكومة هيه اللي شايلة المسئولية انا شايف ان الحكومة تدي بلانص للمعلمين وتبيع المدارس وتخصخص المدارس وتشرف بس علي المناهج وربنا هيتأدبوا المدرسين ولاد الايه !...اللي سارقين عرقنا وشقانا ومضيعيين مستقبل اولادنا الفشلة الجبارين ...حرام عليكي ياحكومة والله مافي وزير هيفلح مع المعلمين التنابلة سيبوهم واسمعوا كلامي للقطاع الخاص والملاك واصحاب رؤس الاموال همه دول اللي هيأدبوهم ولا وزير نافع ولو استوردتوا من الخارج وزير برضه مش هينفع مع اولاد الايه اللي بيشتغلوا جنب التدريس اللي بيبلطجوا فيه بيشتغلوا سماكين يعني بييعوا سمك ولا اللي بيقلي طعمية ويبيعها فاسدة ولااللي ماسك الفاس والكريك بيشتغل في غيطه غيطه يعني حقله مش اقصد الوزير ابوالغيط !!!

ده حتي التجريبي غششوه والضرب رجع ياولداه للمدارس ابراهيم الابيض وحين ميسرة رجعوا كمدرسي للمدارس وكام حادثة الاسبوع اللي فات والوزير مشغول انه يمشُي ويطٌلع بتوع الوزير السابق ويجيب رجالته وهتتكرر المأساة والبروفة من تاني وهيطلع الوزير الجديد من الوزارة عند اول غلطة مش قلتلكوا والله ده هيحصل ومافيش حل الا الخصخصة وبيع المدارس وريحو دماغكوا ياحكومة وخليكوا للتخصص بس والمناهج وريحوا دماغكوا من الاداريات والماليات ووجع والم المعلمين لانهم (معلمين يعني معلم بطيخ وسمك ) وبيع يا معليم بيع !

كتبه بالرأفة : محمد امام نويرة

بيان حالة الاتحاد لامريكا وبيان حالة اتحاد الكورة ..وعجبي !

هو ايه الموضوع بالظبط يارجالة ..
مافيش حد منا عربي او قومنجي او اسلامجي يبص شوية ويتأمل السياسة في امريكا واوروبا وباقي العالم نهضهم الا احنا ..هايصين في الزعيق ..طول النهار زعيق في كل حاجة..كلام مضروب وكلام في كلام ويابخت من كان المشايخ خاله.. بص للمشايخ في الفضائيات نازلين رغي ليل نهار عمال علي  بطال وفتاوي في كل لون "ياباتستا".. والله حتي الفتاوي في مسائل علمية زي "موت المخ وموت الطحال" ماتعرفشي ..والشيخ فاكر ان الموضوع كله "كرشة وسقط "ولايعرف ايه الموضوع بس لازم قدام جمهوره المريض يتكلم ماهمه عارفين انه سره باتع وانه عارف في كل حاجة  ..المهم ماتلاقيش مواضيع جدية ابدا ولا موضوع ليه اهمية او يتناول مصالحنا الحقيقية ....سمعت باستمتاع بيان حالة الاتحاد للرئيس الامريكي ..ايه ده ؟؟..ايه الحلاوة دي ..بيع يامعلم بيع ! ..ياحلو ياامريكاني ..ايه الثقافة دي ..وايه الاستغراق في مصالح الفرد والمواطن الامريكي.. وايه الجمهور الجاد والمحترم ده ..وتعالي شوف عندنا واسمع بيان حالة القذارة والرط والعجن طول النهار في الفاضية والمليانه وماحدش بيطيق اي اخر يختلف معاه والمزاد اللي جاري عند المكلمنجية بتوع حكاية القومية "المفعصة " زي السناوي وعبدالحليم قنديل اللي اول الواحد مابيمسك المكرفون وهو جاهز للتفتفة اللي بتوصللنا مع كلامه المقرف نقطة نقطة !.. ولا بتاع الاخوان اللي جاي في ندوة البيبي سي وهو بيبي فعلا حالق لسة ...والله الكاميرا جابته وهو قبل مايتكلم عمال مطلع لسانه بيلحس حوالين بقه مانهضش يغسل بعد الوجبة الطازجة اللي اكلها في مقر الندوة قبل مايخش عليه ..المهم هو معرفش قال ايه اي والله ...بس كان هو مشغول بحلاوة الاكل الساخن والمشويات اللي اكلها قبل الندوة.. حاجة كده ماشافهاش قبل كده حتي مش معاه منديل ورق يمسح بيه بقه.. ولا يمكن كان فيه بقايا اكل او حلويات حوالين شفايفه فعمل لفة بلسانه علي "الطريق الدائري" جاب المكسرات قبل ما تقع علي الارض ماهو حرام دي نعمه برضه مش كده ولا ايه ؟؟!!... وسلملي علي بيان حالة الاتحاد السكندري او اتحاد الكورة بتاعنا وخللوا بالكوا نزلوني المحطة الجاية ..بااااااااااااااااااااي.
كلام تم لحسه ! محمد امام نويرة

قومية عربية بالكاتشب والزيت الحار والفن والسياسة والحي ابقي من الميت

في ندوة نقلتها قناة الشريرة مباشر علي الهوا حتي والله بردت وجالي رشح وعطس مش عارف من كلام الندوة ولا من هوا الشريرة ولا ايه بالضبط مش عارف ..المهم الحكاية ان الندوة عن علاقة امن غزة بالامن المصري ..المهم الدكتور مش عارف لقيوه فين بالضبط هو دكتور مصري بس باين عليه كان مصٌدي من كتر الركنة في الانتيكخانة وجايز والله اعلم لسه صاحي من ستينات القرن اللي فات والعرق نازل منه والراجل تعب فعلا وهو بيحاول يقنعنا بان امن مصر مرتبط بامن غزة ..وو وو الي اخر كلام الهجص بتاع القومنجية والناصرية والاسلامنجية ومنادي السيارات في المواقف وكل واحد منهم ليه موقف اما في احمد حلمي او السلام او العاشر ..المهم افندينا قعد يقول اللي يضيع شيء عليه هو اللي يحضره من تاني يعني مصر ضيعت غزة لما كانت تبعها قبل 67 وعليها ترجعها .ومن قدم شيء التقاه وهنيالك يافعل الخيروالثواب.كلام ياخي مش عارف ليه رد غير ان الواحد يجيبله صايع من حوش بردق ولا الدويقة  وكتير همة يعمل للدكتور علي الهوا في قناة الشريرة مداخلة عبارة عن حركة وسخة كده غنة طويلة !! ..لان بصراحة معدش ينفع كلام مع ولاد الايه دول لسه بنعشق المخلل المرمم بتاع القومية العربية وان مصر كل مايحصل خناقة بين برغوت وفيل في اي دولة عربية تبقي هيه المسئولة لالا ياسيدي قفلنا الدكان اللي كان بيدي ببلاش مش كده ولا  أقول أ.. ا...اا...ا زي الصايع اللي عمل مداخلة !!!

مش عارف يااخي هنخرج من حالة الهبل اللي فيها ناس عايشة الدور ومخهم لاسع ..انا نفسي نتعلم البراجماتية في السياسة دول اوروبا وامريكا رغم انهم مركب واحد وامن واحد ونظرية واحدة وحضارة واحدة لكن ماحدش منهم بيزعل من التاني لما بيفضل مصلحة شعبه وبعدين لازم الاجرة تندفع من الكل لوفيه شيء مشترك لانهم بيتحاسبوا كحكام علي مصالح شعوبهم فقط يعني لما عملوا الاتحاد الاوربي ولسه كانت دولة رافضة تدخل او تلغي عملتها لصالح العملة الاوروبية المشتركة اللي هيه اليورو وشافوا ان ده ضد مصالح اقتصادهم لغاية لما عرضوا الامر علي استفتاء شعبي محدش زعل من دول ابدا وقال انهم فرطوا في القومية الاوروبية ولا الديجولية ( نسبة الي ديجول) او ان ده ضد الدين المسيحي

لالا كل واحد ادري بمصالح شعبه وحريص عليها ولو فيه مصلحة مشتركة هيوافقوا عليها بس لانها لمصالح كل شعب اوروبي مش علي حساب دولة بيقولوا عليها الاخت الكبيرة زي مصر ظلت الاخت الكبيرة لغاية ماعنست ولا اجوزت ولا لاقية تتجوز ...واحد عطس ...يرحمكم الله ..؟؟!!

ــــــــــــــــــــــــــــــــــــــــــــــــــــــــــ

الافلام الايام دي نازلة ترف واغلبها بقلد مدرسة خالد يوسف تلميذ "وحبيب "المخرج العالمي يوسف شاهين ..وكلها مواضيع جنس  وعشوائيات وارهاب ديني ..

اخر افلام الجنس فيلم قليل الادب حتي من اسمه باين اسم الفيلم    (  أحا......سيس ) !!!!

ـــــــــــــــــــــــــــــــــــــــــــــــــــــــــــ

 كتبه : محمد امام نويرة

زواج سي الدكتور نظيف ( واشمعنه احنا لأ) والبطاقة الذكية المقترحة للقاء الزوجي !

ايه الموضوع يارجالة !

الرجالة في المعارضة والفضائيات والجرائد المستقلة شاغلين ارواحهم بالكلام والاشاعات بعد ما أعلن سي الدكتور نظيف عن زواجه الشهر القادم ! مع ان الراجل ياولداه لسة قابض الجمعية اللي عاملها من عشر سنين علشان يتجوز تاني عاملها هو والعادلي العادلي اجوز الاول وقال لنظيف علشان  انت اطول مني خليك التاني ورايا ! بس انا عندي تفسير لزعل البعض وانشغالة بالتقطيع في سيرة زواج الدكتور نظيف ! والغيرة منه.. ايه هو ؟؟..

يظهر ان اغلب المعارضة واغلب اللي بيشتغلوا في الجرائد المستقلة والفضائيات عندهم بنات (عنسوا ) وكبروا ومش عارفين يجوزوا وقاعدين في بيوتهم زي" العمل الردي" ..كان نفسهم يناسبوا الدكتور نظيف ..وازاي الدكتور نظيف مش يناسبهم ليه همه مش من عامة الشعب وبعدين الدكتور نظيف ماشاءالله طول طول وعرض وحليوة ويتناسب صح !..وبعدين كل شيء عنده مظبط بالكمبيوتر ياحبيبي ! هو عمل لينا البطاقة الذكية للتموين وبعدين فيه اشاعة انه هيعمللنا ايضا بطاقة ذكية للقاء الزوجي يحدد عدد المرات في الشهر وقبل ما الراجل يدخل علي مراتة يمرر البطاقة الذكية في الجهاز اللي هيبقي في اوضة نوم كل واحد واذا الجهاز صفر يبقي رصيد الراجل خلص ويستني للشهر الجاي واللي مش قرب من مراته وعدي الشهر يبقي رصيده راح عليه وكل المعلومات دي هتكون في كمبيوتر عملاق في القرية الذكية اللي مرتبطة بالاجهزة الموجودة في اوض النوم وبكده يبقي فيه كنترول علي انتاج الاولاد وممكن السيطرة علي عدد السكان بالطريقة دي !

المشكلة ان الجمعيات النسائية وجمعيات حقوق الانسان هي اللي هتزعل وتقاوم المشروع ده لان المسألة دي مش ممكن ميكنتها ممكن الراجل نفسه اتفتحت شوية أو جتله هدية او رشوة ..شوية فياجرا... طب يعمل أيه بيهم لو رصيده نفد وكل مايقرب من مراته في السرير هيسمع منها ( لقد نفذ رصيدكم ) والخيبة ان  ممكن الجهاز يغلط ويبوظ ويقول للراجل (هذا الرجل غير موجود في الخدمة )ساعتها مراته هتشك فيه ومن حقها تطلب الطلاق للضرر واثبات الموضوع سهل ممكن الجهاز يروح المحكمة ويدلي ببياناته وارقامة ويتعرف الموضع ..مشكلة فعلا ....

بس المصريين عندهم ابداع في المواضيع دي ممكن البطاقات بتاعة الجهاز تنضرب وتتقلد وتلاقي فيه بطاقات صيني مستوردة وعملوها للمصريين استغلالا للازمة وممكن الصينيين يزودوا في البطاقة خاصية استحلاب قرص فياجرا كل مرة يبقي البطاقة في الحالة دي هتشتغل كويس والمشكلة لو البطاقة دي اتقلدت في مصر في العتبة او شارع عبد العزيز ممكن لانها مغشوشة تفصل اثناءالعملية وتتصل بالقرية الذكية اوتوماتيك واللي هيه متصلة اصلا بمباحث التموين وفي الحالة دي هيتقبض علي الراجل وفي الحالتين هو مودع مابين طلاق أو خلع ...

المشكلة الأكبر ان الزوجات هيعرفوا المرات اللي استخدم فيها الزوج البطاقة في السوق السودا يعني بره مع اخريات (فري )يبقي هيعرفوا من الجهاز عدد مرات التزويغ الزوجي ومدته وممكن الجهاز هيقول عن عنوان الجهاز اللي استعملت فيه البطاقة يبقي الزوجة هتعرف اذا كان زوجها متزوج في السر عليها ولا بس دعارة ...

    وياريت بس يدخلوا خاصية الاقتراض علي البطاقة ويسدد علي مهلة او تخصم من الرصيد بتاع كل شهر 

ومبروك مقدما للعريس الدكتور نظيف والله لو اتعزمت لاروح "انقط " كفايه انه هو ووزارته جابولنا ( النقطة )..وعموما انا كده كده رايح في الصباحية ... 
كتبه : محمد امام نويرة